बुटवल । पाल्पाको माथागढी गाउँपालिका–७ स्थित झडेवा–रहवास भित्री कच्ची सडक खण्डमा टिपर दुर्घटना हुँदा ३ जनाको मृत्यु भएको छ भने १ जना गम्भीर घाइते भएका छन् ।
जिल्ला प्रहरी कार्यालय पाल्पाका अनुसार शनिबार साँझ करिब ६ बजेतिर झडेवाबाट रहवास चूनढुङ्गा खानीतर्फ जाँदै गरेको लु २ ख ४५२५ नम्बरको खाली टिपर सडकबाट करिब ५० मिटर तल खसेर दुर्घटना भएको हो ।
दुर्घटनामा चालकसहित ४ जना पुरुष घाइते भएको पाल्पामा डिएसपी होम बहादुर चौधरीले बताए ।
घाइतेहरूलाई उद्धार गरी उपचारका लागि लुम्बिनी मेडिकल कलेज प्रभास लगिएकोमा उपचारका क्रममा ३ जनालाई चिकित्सकले मृत घोषणा गरेको जिल्ला प्रहरी कार्यालय पाल्पाले जनाएको छ ।
मृत्यु हुनेमा अर्घाखाँची सन्धिखर्क नगरपालिका–४ बस्ने अन्दाजी २६ वर्षीय चालक चिन्ता बहादुर सुनार रहेका छन् । अन्य २ जनाको नाम, थर र वतन खुल्न बाँकी रहेको प्रहरीले जनाएको छ ।
घाइतेमध्ये पाल्पा तानसेन नगरपालिका–१० पटुवा बस्ने ३३ वर्षीय राजन घर्तीको अवस्था गम्भीर रहेको छ र उनको उपचार भइरहेको छ ।
घटनाबारे थप अनुसन्धान भइरहेको जिल्ला प्रहरी कार्यालय पाल्पाले जनाएको छ ।