नवीन विक , अर्घाखाँची ।
नेपाल कम्युनिष्ट पार्टी (एमाले) जिल्ला कमिटी अर्घाखाँचीको जनसंगठन समन्वय संयन्त्रको दोस्रो पूर्ण बैठक विभिन्न निर्णय गर्दै सम्पन्न भएको छ । बैठक आज सनिवार नेकपा एमाले अर्घाखाँचीको पार्टी कार्यालय सन्धिखर्कमा सम्पन्न भएको हो ।
दोस्रो जनसंगठन समन्वय संयन्त्रको बैठकले जिल्लामा क्रियाशील एमाले निकट २१ जनसंगठनले आफ्ना नियमित बैठक यहीँ फागुन १० गतेभित्र राख्ने निर्णय गरेको नेकपा एमाले अर्घाखाँचीका उपाध्यक्ष शम्भु पोख्रेलले जानकारी दिए । फागुन १० गतेभित्र बस्ने संगठनका बैठकले अबधि पुगेका जनसंगठनले अधिवेशनको मिति तय गर्ने र बैठकमा कार्योजना बनाएर पार्टीको ३ महिने जनअभियानमा जनसंगठन सहभागी बन्ने निर्णय गरेको पनि बताए ।
नेकपा एमालेले माघ, फागुन र चैत महिना ३ महिने जनअभियान संचालन गरिरहेको छ ।
यस्तै बैठकमा नेकपा एमाले लुम्बिनी प्रदेश सदस्य सरोज भुसालले अहिले नेकपा एमाले विरुद्ध विभिन्न ठाउँबाट कु-प्रचार भइरहेको बताए । एमालेले गरेका राम्रा कामको पनि कु-प्रचार गरिरहेकाले त्यस्ता कुरामा सबै सजक हुनुपर्ने बताए । ‘अहिले विभिन्न ठाउँबाट एमालेलाई कमजोर बनाउन खोजिदैछ, त्यस्ता कुरामा सचेत अपनाउनु पर्नेछ ।’ उनले भने ‘एमालेले जनताको पक्षमा काम गर्दै आएको छ, आगामी दिनमा पनि जनअपेक्षा अनुसार काम गर्नेछ ।’
बैठकमा विभिन्न जनसंगठनका अध्यक्ष तथा पदाधिकारीहरुको सहभागीता रहेको थियो । बैठक एमाले जिल्ला उपाध्यक्ष तथा जनसंगठनका संयोजक शम्भु पोख्रेलको अध्यक्षता र राष्ट्रिय युवा संघ नेपाल जिल्ला कमिटी अध्यक्ष शोभाखर पाण्डेको संचालनमा सम्पन्न भएको थियो ।