काठमाडौं । प्रतिनिधिसभा निर्वाचनमा अप्रत्याशित पराजय भोगेपछि नेपाली कांग्रेसका सभापति गगन थापाले पदबाट राजीनामा दिएका छन्। उनले आफ्नो राजीनामा उपसभापति विश्वप्रकाश शर्मालाई बुझाएको पुष्टि भएको छ।
निकट स्रोतका अनुसार केही दिनअघि नै थापाले राजीनामा बुझाएका थिए, तर यसको औपचारिक टुंगो भने अब बस्ने केन्द्रीय कार्यसमिति बैठकले लगाउनेछ। पार्टीभित्र उनको निर्णयलाई लिएर तीव्र चासो र बहस सुरु भएको छ।
फागुन २१ गते सम्पन्न प्रतिनिधिसभा निर्वाचनमा सर्लाही–४ बाट उम्मेदवार बनेका थापा पराजित भएपछि पार्टीभित्रैबाट नैतिक जिम्मेवारी वहन गर्न दबाब बढ्दै गएको थियो। पराजयलगत्तै उनले उपसभापति शर्मासँग भेट गर्दै राजीनामा दिने संकेत गरेका थिए।
यसअघि काठमाडौं–४ बाट लगातार जित निकाल्दै आएका थापा यसपटक भने सर्लाहीमा चुनौती सामना गर्न पुगेका थिए। उनलाई रास्वपाका अमरेशकुमार सिंह ले हराएका हुन्, जसले निर्वाचन परिणामलाई अझ चासोपूर्ण बनाएको छ।
चुनावी परिणामले पनि कांग्रेसलाई झट्का दिएको छ। राष्ट्रिय स्वतन्त्र पार्टीले झन्डै दुई तिहाइ सिट जित्दै अग्रस्थान कब्जा गर्दा कांग्रेस ३८ सिटमा सीमित भएको छ—जसमध्ये १८ प्रत्यक्ष र २० समानुपातिक छन्।
राजीनामाको तयारीमा रहेका थापालाई पार्टीभित्रका धेरै नेताहरूले निर्णय पुनर्विचार गर्न सुझाव दिँदै आएका थिए। तर अन्ततः उनले राजनीतिक जिम्मेवारी स्वीकार्दै पद त्याग्ने निर्णय लिएका हुन्।
निर्वाचनअघि विशेष महाधिवेशनबाट सर्वसम्मत रूपमा सभापति बनेका थापाको यो कदमले कांग्रेसभित्र नयाँ शक्ति सन्तुलनको बहस सुरु गराएको छ। अब सबैको ध्यान आगामी केन्द्रीय बैठकतर्फ केन्द्रित भएको छ, जहाँ उनको राजीनामाबारे अन्तिम निर्णय हुनेछ।