सन्धिखर्कमा गोठमा हलगोरु पाल्ने कृषकलाई प्रोत्साहन रकम

सन्धिखर्कमा गोठमा हलगोरु पाल्ने कृषकलाई प्रोत्साहन रकम
नेपाल राज्य संवाददाता
अर्घाखाँची– गाउँमा हल गोरु पालेका कृषकलाई सन्धिखर्क नगरपालिका–१ वडा कार्यालयले प्रोत्साहन रकम उपलब्ध गराएको छ । १८ जना कृषकलाई ५ हजारका दरले रकम वितरण गरेको छ ।
पछिल्लो समय खेतबारी जोत्न गोरु नपाल्ने र टयाक्टर तथा कृषि औजारबाट खनजोत गर्ने चलन बढ्दो भएकाले बेला वडाले गोरु पाल्ने कृषकको तथ्यांक संकलन गरेर प्रोत्साहन रकम बाँडेको छ । ‘टयाक्टरबाट छिटो छरितो हुने भएपनि गोरु पाल्न प्रोत्साहन गरेका हौं,’ वडाध्यक्ष माधव श्रेष्ठले भने, ‘गोरु पाल्दा खेतबारीमा मल हुन्छ, त्यसले अर्गानिक अन्नबाली, तरकारी उत्पादन हुन्छ । गोरुले जोतेको खेतबारीमा मल राम्रोसँग माटोमा मिसिने र उर्बर भैरहने देखियो ।’
सन्धिखर्क नगरपालिकाको वडा नम्बर १ सदरमुकाम सन्धिखर्क बजार क्षेत्रमा पर्छ । २६ सय घरदुरी संख्या रहेको वडाको तुम्कोट, पटुवाथुम, म्यालपोखरी लगायतका गाउँका कृषकले गोरु पाल्ने कृषकलाई प्राेत्साहन गर्ने माग गरेपछि रकम वितरण गरेको उनले बताए । कृषक प्रोत्साहन कार्यक्रमको लागि वडाले १ लाख रकम विनियोजन गरेको थियो । प्रोत्साहन रकम पाएका १८ जना कृषक टयाक्टर किन्न नसक्ने गरिब किसान हुन । धनीले टयाक्टर किनेपनि उनीहरुले खेतबारी जोत्न घरमा हल गोरु पाल्दै आएका छन् ।
नगरपालिका प्रमुख प्रशासकीय अधिकृत खिमानन्द भुसालले गोठमा हलगोरु र गाई पाल्ने कृषकलाई थप विशेष कार्यक्रम ल्याइने बताए । ‘गाइगोरुको गबर मलले खेतबारी मोलिलो हुन्छ र उत्पादन राम्रो हुन्छ,’ उनले भने, ‘बारीमा युरिया, विषादी होलेर होइन, गबर मल हालेर अर्गानिक उत्पादन गर्नुस् । बजारमा तरकारी खाद्यवस्तु बेचेर मनग्य आम्दानी लिन सकिन्छ ।’ टयाक्टर किन्ने रकम नहुने र गोरुपाल्ने किसानलाई प्रोत्साहन रकमले थप हौसला मिलेको कृषकहरुले बताएका छन् ।